犬與犬（下）
上集：https://bit.ly/3cbtRi1
黑白狗一啲都唔怕生，好開心咁行埋嚟：「你哋係嚟同我玩㗎？我好悶啊。我係哈士奇，你哋係咩狗？」
大舊下意識答：「肉狗。」
「肉狗？我未聽過，係咪好鍾意食肉嘅狗？」
哈士奇側一側頭：「我都好鍾意食肉，點解我唔叫肉狗？我要問吓主人先。」
佢咁講，似乎佢嘅主人從來唔食狗肉，我哋嘅求助又多一分希望。
我繼續試探：「你同主人關係好好？」
「主人係世界上最好嘅人，佢會餵我食肉，帶我出街，陪我玩……」哈士奇一路講一路搖尾。
飛毛忍唔住問：「咁你呢？你要為主人做乜嘢？」
我哋自細受到嘅教育，就係有收獲，必然要付出，人類餵養我哋，所以我哋要成為人類嘅食物。
「我都識好多嘢，我會叼拖鞋，仲會執波。」哈士奇叼起一隻拖鞋，示範畀我哋睇。
飛毛難以置信：「仲有呢？主人對你冇其他要求？」
哈士奇諗一諗：「主人話我係全世界最好嘅狗，至於要求……好似有，佢最近要求我唔好咬沙發。」
我哋一齊望向被咬得破破爛爛嘅沙發，哈士奇有啲尷尬：「哎呀，咁沙發真係好好咬。」
我仔細觀察間屋，到處都係玩具，牆上仲掛滿咗哈士奇嘅相，主人攬住哈士奇，笑得好開心。
哈士奇咁受寵愛，我諗，佢可能可以幫到我哋。
我斟酌住開口：「其實我哋係有樣嘢搵你幫……」
大舊突然打斷我嘅說話，惡狠狠咁問哈士奇：「點解？」
「點解乜嘢？」哈士奇呆一呆。
大舊大喝一聲：「點解你咩都唔識，點解你傻更更，人類都對你咁好，我哋就要俾人食？我哋拚盡全力，都只係想生存咋！」
哈士奇呆若木雞。
飛毛撲向嗰隻拖鞋，用迅雷不及掩耳嘅姿態叼番嚟：「我叼拖鞋比你更快。」
大舊咬起個波，擲上天空，飛毛穩穩地接住：「我執波比你更勁。」
「而且我哋絕對唔會咬沙發，主人話咩，我哋就做咩。」大舊加多句。
哈士奇手足無措，只可以講：「我……我唔明，我有嘢食可以分畀你哋，冷靜啲。」
「我唔要你嘅拖捨！」大舊撲埋去，一口咬斷咗哈士奇嘅喉嚨，鮮血噴射而出。
我完全想像唔到佢會咁做，連阻止都嚟唔切。
飛毛踢一踢哈士奇嘅屍體：「大家都係狗，佢憑咩過咁好嘅生活？」
我尖叫：「你哋搞乜鬼啊？」
「我哋做到晒主人嘅要求，就應該由我哋做呢間屋嘅狗，我哋一定會做得比佢好。」大舊沾沾自喜。
我頭都痛埋：「計劃唔係咁，我哋係要搵哈士奇幫手，通知佢主人，舉報養殖場，救我哋嘅親人出嚟。」
飛毛答：「放心啦，我會成為主人最愛嘅狗，主人肯定會幫我搞掂養殖場嘅事。」
「我覺得主人會愛我多啲囉。」大舊反駁。
我望住血淋淋嘅大舊，覺得件事愈嚟愈荒謬。
無論我點樣勸，佢哋都覺得自己會成為新寵，步上狗生巔峰。
呢個時候，鎖匙聲響起，我只好從狗洞鑽出去。
我喺屋外偷望，見到主人行入嚟，飛毛迅速叼起拖鞋，大舊就叼住個波，係咁搖尾。
主人望住哈士奇嘅屍體，一臉難以置信。
然後，主人又出咗門口。
大舊問飛毛：「佢去邊？」
「可能要養多隻狗，要買多啲玩具掛。」飛毛答。
冇幾耐，一班拎住狗籠嘅人衝入嚟，迅速將飛毛同大舊捉入狗籠。
主人大叫：「係佢哋啦，呢兩隻野狗咬死咗我隻狗，係咪會人道毀滅㗎？」
籠中嘅飛毛哀嚎：「主人，我哋叻過隻哈士奇㗎，你聽我講……」
可惜，人類只係聽到「汪汪汪」，毫不留情咁捉走佢哋兩個。
我知道，等待佢哋嘅一定唔會係好運，為免俾人類發現，我唯有逃離呢個地方。
我要活下去，我仲要舉報養殖場，救出親人。
只不過，做呢個任務嘅，剩低我一個。
事後我經常諗，點解飛毛同大舊會搞成咁呢？
或者係因為，舉報養殖場、同養殖場嘅人作對，呢條路實在太艱難。
打倒大魔頭遙遙無期，我哋會攰，會嫉妒付出更少，但過得更好嘅同類。
打倒同類，點都比打倒大魔頭容易。
結果，我哋嘅敵人由大魔頭變成同類。
－完－
將專頁設定為「搶先看」/ "See first"，最新故仔馬上睇！
我老公養咗條蛇：https://goo.gl/ZroifF
我係外星公主：http://bit.do/eUwgU
#短故 #短篇 #小說 #陳美濤 #廣東話 #粵語 #tomatochan #犬與犬
Search